«Ермак же …побеже в струги своя и не може дойти, потому что одеяны железом и струги отплыша от брегу, и не дошед до стругов, утопе в реку Иртышу»

О пришествии Ермакове с товарыщи во град Сибирь

Како убо под Чювашавым у засеки бой был, казаки же утрудишась, уже нощи пришедши отидоша оттуду, начюваша ту и стражи утверди крепкие от поганых, яко змии ухапят окаяннии. На утри же вси казаки восташа и на господа бога упование возложиша и поидоша во град Сибирь и приидоша Ермак с товарышы своими во град Сибирь в 7089 году октября в 26 день, на память святаго мученика Димитрия Селунского, прославиша бога, давшаго им такоюпобеду на окаянных бусорман и идолопоклонник и радостию велиею радуюшеся. Воистинну достойно воспомянути сию победу и в предидушая лета, яко немногим войским такова царства взяша помощию всесилнаго бога и угодником его страстотерпцем Димитрием.

По взятии же града Сибири в 4 день приидоша во град Сибирь остяцкой князец имянем Бояр со многими остяки, принесоша же Ермаку и казаком многие дары и запасы, что им на потребу. По нему же, князе, начата приходити татаровя мнози з женами идетми и начата жити во граде Сибири в первых своих домех. Видявше же православное воинство, бог повеле покорити их татар под высокую государскую руку и всем православным християном в покорение. Того ж месяца декабря в 5 день Ермаковым казаком идущим без опасения с промыслу рыбной ловли, и быта на Абалаке и поставиша стан свой и уснуша без стражей своих.

Царевич же Маметкул пришед на них казаков тайно внезапу со многими людми и побита их на стану. И уведавше Ермак, что казаков ево убили, погна вслед с казаки своими на поганых и достигоша близ поля, и бысть с погаными бой великий на мног час; у царевича же Маметкула побита множество татар, и устремися царевич Маметкул на бегство. Ермак же в целости с казаки своими ничим не вредим возвратишася во град Сибирь.

О послании к великому государю к Москве сонучаком царевичем

Како изволил бог православным християном Сибирское царьство всяти, и по всяти того ж лета Ермак с казаки своими послаша к великому государю к Москве сонъучака с атаманом казачым и писаша об нем к благочестивому государю царю и великому князу Ивану Василевичю, вса Росии самодержцу, что изволением божим и всемилостиваго в Троице славимаго бога и пречистыя его богоматере и святых великих всеа Росии чюдотворцев молитвами и его, государя царя и великого князя Ивана Василевича, всеа Росии самодержца, праведною молитвою ко всещедрому богу и его щастием царство Сибирское взяша и царя Кучюмя и з войским ево побита и под его царьскую высокую руку подведоша многих живуших в том Сибирском царьстве татар и остяков и вагулич и протчих языков, иже под его властию быша, и к шерсти их, татар, приведоша по их иноземской вере многих, что быть под его государскую царьскую высокую руку до скончание века, покамест бог изволит, а великого государя язак им, иноземцом, давать всегда по вся лета безпереводно, а на православных християн никаково не мыслить.

А которые иноземцы похочет в его государьскую службу, служить и радеть и прямить, ево государевых недругов не спутает, елико бог помощи подаст, и самим им государю служить и не измянять и к царю Кучюму и в ыные орды и улусы не отъехать и зла на православных християн никакова не мыслить и во всем правом постоянстве, на чем они по своей вере шерсть дали, стоять неподвижно. Атаман же и казаки к великому государю к Москве приехав, поведано ж бысть о приезде их. Благочестивы государь царь и великий князь Иван Васильевич, всеа Росии самодержец, слыша и повеле отписку у атамана принять и вычесть вслух пред своим царьским лицем.

И егда услыша государь, что помощию божию и силою, что снабдить государство и пространство дарует и покаряет и непокоривыя, повинны творит враги его и подручны сопостаты, тогда же прослави бога и пречистую его богаматерь, иже такову яви свою пребогатую и великую милость в жителство християном: не от многово воинства таковае побеждение на поганых бысть. Ермак же заочным государьским словом пожалован; атамана ж и казаков великий государь царь Иван Василевич, всеа Росии самодержец, пожаловал своим царским жалованем, денгами и сукнами добрыми. И потом государь приказал их казаков отпушать в Сибирь к Ермаку и послать свое государево жаловане многое за их к нему великому государю службу и за пролитие крови их.

О всятии Сибирского царевича Маметкула от руских казаков

Во время некое прииде во град Сибирь к Ермаку татарин имя ему Сенбахта и поведа Ермаку, что де царевич Маметкул Кучюма царя сын стоит на реке Вагайе, от града же Сибирь будет со сто попрыш. Ермак же слыша про Маметкула и посла некоторых от своего войска ради товарства своего младых и искусных людей ратному делу вооруженных. И за помощию божию поидоша сии людие и дошедше на стан их падоша на ных, им же спящим, а иним же не спещим, и в то время поганых побита и до царевича щатра доидоша и обыдоша его кругом и его, царевича Маметкула, взяша жива со всем богатством ево и привезоша его во град Сибирь к Ермаку с товарищи. Ермак же принял ево с радостию и скажет ему великого государя жаловане и ублажает его ласкочердием.

Царь же Кучюм ожидая сына своего царевича Маметкула к себе с людми своими многое время. Приехав с же к нему вестницы и сказаша ему царю, что сын его Маметкул взят в полон и отвезен в Сибирь к Ермаку. Царь же Кучюм слыша велми болезнова о сине своем и много в болезни плакася горко. Приидоша же к царю Кучюму из степи вестницы и сказаша ему, что идет на него Кучюма со многим воинством из Бугарские земли князь Сейдак Бекбулатов сын. Царь же Кучюм, слыша от поведаюших словеса сия, и убояся страхом великим зело и от убиения крыяся. Князь же Сейдак, воспомянув отечество свое и наследие, и отмстих кровь отца своего Бесбулата хочет.

По сем же царя Кучюма думной ево Карача, которой у думы ево Кучумовы был, с своими людми оттыде от царя Кучюма и не возхотеша бысти в повиновении пред им. Слышав же сия, царь Кучюм зело возплакася плачем и воплем великим и рече: «В себе его бог не помилует, и думни мой и друзи меня оставляют». И бысть яко враги отступиша от него. Карача же прииде к Юлминскому озеру, иде же вверх по Иртышу реки меж реки Тары и реки Оми и тут пребываше. Ермак же с воинством своим храброваше по всей Сибирской земли свободными стопами, ни от кого устрашашеся, страх бо божий на всех живущих тамо, яко мец обоюдуостр иды пред лицем руского полку. И страша и посекая многия городки и поганых улусы по реке Иртышу, и по великой реке же Оби Казымской болшой городок славной их взяша и князей с всеми их богатством. И возвратишася Ермак оттуду с вои своими во град Сибирь с радостию и с корыстию и князей привезоша во град Сибирь.

О послании из Сибири града к великому государю к Москве царевича Кучюмова сына Маметкула

Послаша из Сибири в царьствующи град Москву царевича Маметкула со многими воинскими людми. И как ево, царевича Маметкула, к Москве привезли, и в то время, изволившу богу, благочестивый государь царь и великий князь Иван Васильевич, всеа Роси самодержец, ко господу отыде в вечны покой.

По своем же преставлении на свой царской престол повеле возвести сына своего благочестиваго государя царя и великаго князя Феодора Ивановича, всеа Росии самодержца. И по повелению ево, великого государя царя и великого князя Феодора Ивановича вса Росии, указал ево, царевича Кучюмова сына Маметкула, стретить честно, и на приезде ево великий государь пожаловал своим царским жалованем, потом же и служилых людей, которые ево Маметкула взяли и провожали из Сибири к Москве выход, денгами и сукнами и кормом доволно.

О убиении Ермаковых казаков от Кучюмова думного Карачи окаяннаго

В том же 7091 году после отпуску царевича Маметкула к Москве приидоша во град Сибирь к Ермаку от думного Карачи послы и просиша у Ермака людей от обороны их от Казачы орды. Ермак же, слыша словеса их, и велел тем посланцом на правде шерсть дать, что никакова зла и дурна на государских казаков не мыслить, и в том шерсть и дали. Ермак же с товарыщи своими учиниша совет и по совету повериша их безбожному и лукавому проклятому шерстованию.

Выбрав из войска своего лутчих людей храбрых, атамана Ивана Кольцово, а с ним сорок человек казаков вооруженных, и отпустиша с посланцы к думному Караче. И как приидоша атаман с казаки к нешестивому и безбожному Караче и в то время внезапу от нечестиваго Карачи божим попушением всих казаков побиша невозвратно. И по неколицем дни послыша Ермак, что думной Карача проклятой атамана и казаков побил а, зело плакаху на мног час, аки о чадех своих. Учинись же про то казачье убиение ведомость во уши поганым, что атамана и казаков побита, и начата в многих местех во области по волостям и по городкам казаков побивать.

О приходе думного Карачи на град Сибирь

В том же 7091-м году заговев великого поста прииде на град Сибирь из степи думной Карача со многими воинскими людми и обыдоша град обозами и табары поставиша. Сам же Карача в некоем месте, зовому Сайускан, от града Сибири верст с семь, многу же жесточь и тесноту гражданом творяше, и тако стояху до пролитию крови.

И того ж году в месяце июле изыдоша людие и въсе воиское из града и на табары и на станы и на обозы их нападоша нощию, иным же спящим без опасения, и побища множество нечестивых татар и прогнаша в Саускан. И в то время двух сынов думного Карачи на том бою убиша, и всии погании в бегство вдашася безвратно; думной же Карача и с ним немнози погани убегоша. Инии же прибегоша во град Сибирь и сказаша всем бывъшее, и слыша во граде градскии людие и татаровя, что стояху погани во отступлени града и прибегоша в Саускан, и говорях, что будет на казаков победа и смерть, и чаяхом преданы смерти.

Казаки же от поганых крыяхуся и надеяся на помощь божию, и по малу времене выхождаху казаки из града на поганых и бишася крепце, и бысть у них бой до полуднии и преста. Татара вяшя же поганы отступиша от казаков, казаки же возвратишася во град Сибирь радоюшеся, ничем не вредими. Видявше ж Карача и рече: «Не со многими не возможно казаков одолети, се бо бог помогает им». И отыдоша погании в далные своя жилища с срамом. И живяше казаки во граде Сибирь, славяще господа бога и стастотерпца ХристоваДимитрия.

О убиении атамана Ермака и казаков от поганых татар

Лета 7092-го году изволением божим уготовася час волии божии, прииде на казаков смертной час. Приидоша весницы в Сибирь град к Ермаку и сказаша ему, что царь Кучюм не пропустит в Сибирь торговых бухарцов. Ермак же слыша о том и не со многими людми воинскими поиде на встречю их по реке Иртишу в стругах. И дошед до реки Вагайю, бухарцов никого не обретоша и оттуду пошед по Вагайю реке вверх до Атбашкого стану, и тут не обретоша никого же и оттуду возвратишася назад. И дошедщи до перекопи, казаки же утрудишася от многаго пути и поставиша станы и сторожу крепкую утвердиша и обначевашему и размышлея и ослабеша умы своими, что приходит смертной час.

Царь же Кучюм, подсмотря тою нощи, что казаки стали на стан свой, повеле людем своим по многим местам розсослать. Тоя же нощи приидоша на стан казаков множество поганых татар, казаком же спящам безо всякого опасения, и нападоша на них незапной и побиша всех, толко един от них казак убежал. Ермак же виде в страсе своем, что казаков погании побиша, и ни от кого же не видя помощи животу своему и побеже в струги своя и не може дойти, потому что одеяны железом и струги отплыша от брегу, и не дошед до стругов, волею божию утопе в реку Иртышу. И приидоша на Ермака и на казаков смерть, и живота своего гонзнъуша, убиение же их месяца августа в 5 день на предпразднество владычнаго преображения господа бога и спаса нашего Исуса Христа. Слышав же сия убиение казаков во граде Сибири, оставшая казаки, что атаман Ермак утопе, а казаки от поганых побиты, плакахуся же плачем велим зело на многое время и видявше, что у них казаков во граде Сибири наставъника не стало, и з прочими казаки убояшася жити во граде и изыдоша из града Сибири, и сяде в струги своя, поплыша вниз по Иртышу реке и великой реке Оби и Обию рекою через Камень бежаша, град же Сибирь оставиша пуст.

Уведав же о том царевич Алей Кучюмов сын, что казаки побегоша из града Сибири, прииде с людми своими и вниде во град Сибирь и водворися ту. Слышав же сия князь Сейдак Бекбулатов, что атаман Ермак и казаки на перекопе убиены бысть, а инии же бежаша из града, и собрашася Сейдак с войским и прииде ко граду Сибири, и град взя и облада, царевича же Алея Кучюмова и прочих победи, и владея отчиною отца своего Бекбулата, и така пребыша Сейдак и з домом своим.

О плавании по Иртышу

Во второе лето по Ермакове убиении послан с Москвы от великого государя царя и великого князя Феодора Ивановича всеа Росии самодержца во град Сибирь воевода Иван Мансуров с воинскими людми и доплывша Тоболом рекою до реки Иртышу. Тартара же поганых множество собрашася в уреченное место у реки Иртышу на брегу. Воевода же виде таковое собрание поганых и послыша, что казаки из града Сибири побегоша через Камень, и убояся и не приста ко брегу, поплыша вниз по Иртышу с воинскими людми и доплыша до великой реки Оби. Бе бо тогда прилучися осень, и лед в реках смеряется. Воевода же Иван Манзуров, виде, что наставаша зима, и повеле казаком поставить городок над рекою против устья Иртышного, и сяде в том городке с воинскими людми, и тут начаша зимовати. По неколицех же днех придоша под городок множество остяков, живуших по великой реке Оби и по Иртишу, начаша же к городу приступам со всех стран.

Воински же руские люди из городка противляхуся и тако бишась день до вечера; и пришедши нощи, погании же отступиша от городка. На утри же приыдоша погани под городок со многими же людми и принесоша кумир, его же они чтаху вместо бога. Поставиша же сего кумира под древом и начаша жрети пред ним, и чаяху они от него, кумира, себе помощи, чтоб взяти православных и християн в порабощение, а иных смерти предати. В то же время, егда жруще погании, из городка ис пушки стрелиша и помощию божию древо они и под ним кумира разбита на многие жребаи.

И сего погании устрашишася, не ведуще, что есть сие над ним, кумиром, и чаяху, из лука хто стрелил, и реша друг ко другу: «Силнии /л. 140/ убо сии из сего городка стреляют, дивно – таково древо разбиша и кумира победи нашего». И от того часа вси отыдоша от городка кождо во своя улусы срамом, а помощи себе от своего кумира не обретоша. Воевода же Иван Мансуров дождав же полой воды и собрався в струги своя со всеми воинскими людми, и уплыша по реке Оби через Камень к Русе, а городок свой сожгоша.

О поставлении града Тоболска

По неколицех же днех изыде князь Сейдак из града Сибири, с ним же вышед царевич Казачей орды Салтан да царя Кучюма думной Карача, с ними же вышли из горада воинских людей пятьсот человек. И доидоша до место, иже имянуетца Княжей Луг, и начата пускати ястрепов за птицами. И увидявше их из града Тоболска воевода Данило Чюлов и воинские руские люди, посоветова, отпустиша ко князу Сейдяку посланников и повеле им говорити князу Сейдяку, чтобы он Сейдяк приехал во град Тоболеск советовати о мирном поставление, еще бо ему дыхающу яко ехидне змие на православных християн и не покаряющеся, но яко зми похапить хотят. Посланники же пришед же во град возвестиша сия воеводе, что было поведенное им изречци. Князь же Сейдяк, слыша от них сия словеса, совет сотвориша с царевичем Салтаном и Карачею, и бывшу совету поиде Сейдак во град Тоболеск к воеводе к Данилу Чулкову и с ним царевич Салтан и думной Карача, да с ними же воинских людей для бережения сто человек, а иных оставиша за градом. Приидоша же к воеводе в горницу поздравля, сяде за стол по обычаю. И учиниша про них воевода ясти и говоря с ними много о мирном поставлении. Князь же Сейдяк седьши задумался, ни пия, ни брашна ядяше. Видяв же сие воевода и рече князю Сейдяку: «Князь же Сейдяк, что еси зло мыслиши, ни брашна вкушаше». Рече же воеводе князь Сейдяк: «Аз не мыслу на вас никакова зла». Воевода же Данило Чюлков взем цашу и налив пития и рече: «Князь Сейдяк, аще ты не мыслиши зла на християн, и ти выпей сию заздравную чашу». Приим же чашу, князь Сейдяк и начаша пити и поперхънув ему в гортани.

По сем же приим у воеводы чашу с питием царевич Салтан и нача пити, такожде поперхнув ему. Карача же думной приим чашу и нача пити, також попернув, богу бо видявшу и обличающе их неправду. Видяв же сие воевода и пред ними предстоящий, что они, Сейдяк на государя и на християн зло мысляше, князь же Сейдяк и царевич Салтан и думной Карача мысля, християн хотя смерти предать, и виде воевода лукавство и неправду их, в окно своим воинским людем помахав из руки своей платом, и воинские руские люди начаша поганых сетчи и бити. Князь же Сейдяк, увиде сечю, кинувся в окно, за ним же кинулся царевич Салтан и думной их Карача, и в тот час воинские люди их нечестивых и безбожных врагов схваташа и вязаша, а иных ближных людей вскоре побита, а иние мнози погании в бегство устремишася и побеждении быша, и нихто же осташася во граде Сибири.

И собрал Кучум остатки войска

И по неколицем же времяни воевода Данило Чюлков послаша князя Сейдяка и царевича Салтана и думново Карачю с ними же к великому государю в царствующи град Москву с выборными воинскими людми. Когда же побежден бысть царь Кучюм и збежа из царства своего в степь, и обрете себе место и ста ту со оставшими людми своими, и многажды покушашеся итти в Сибирь и пленити град Сибирский и место отвратить у православных християн, но страхом одержим бысть, бояся прежнего побеждения. Некогда ж покусися царь Кучюм итти из улузу своего и собрав людей оставшая, сколко есть, и поидоша в Сибирь.

И дошед до реки Иртышу, не близ града Тоболска, и нападе на него страх и трепет и ужас, и пойде ко граду Тоболску, но немногие веси победи и поплени и бежавше вспять, идеже пребываше. И познаваше в граде Тоболску, что царь Кучюм попленил татарские волости и убежав, и в то время собрашася руские воинские люди и погнашася за царем Кучюмом вслед его не мешкая, и постигоша его близ поля, и нападоша на них воинские люди, и божиею помощию и великого государя счастием воинство царя Кучюма побита и его царя Кучюма и с ним две царицы жены ево и сына его царевича взяша и множество богатсво преобретоша, и возвратишася воинские людие во град.

И в то время небрежением стражей своих от цариц царь Кучюм убежа не со многими людми и добежав до улусу своего и взяв оставшая люди своя, и отиде из улусу своего в степь в Калмыцкую землю. И бывшу в Калмыцких улусах, подсмотривши стада конские и начаша их отгоняти. И познавша его калмыцкие люди и погнашася вслед его, и постигоша и царевых людей многих побиша и коней своих взяша. А царь же Кучюм убежал в Нагайскую землю и тамо убиен бысть от нагайских людей, и тако скончася житие его.

Продолжение следует

Источник: Сибирская летопись (краткая Абрамовская редакция Есиповской летописи, XVIII)
Взято: История татар. Том IV. Татарские государства XV-XVIII вв.
Подгот​​​​​​​овил: Владислав Безменов